မူရင်း – https://eos.com/make-an-analysis/shortwave-infrared/
လှိုင်းတိုအနီအောက်ရောင်စဉ် ၂ (SWIR2), အနီအောက်ရောင်စဉ်ဦး (NIR), အနီရောင်စဉ် (Red) ပေါင်းစပ်ခြင်း
Band combination: SWIR2, NIR, Red
SWIR2(လှိုင်းတိုအနီအောက်ရောင်စဉ် ၂)၊ NIR (အနီအောက်ရောင်စဉ်ဦး) နှင့် Red band (အနီရောင်စဉ် ) combination သည်အသုံးများသော ရောင်စဉ်တွဲဖြစ်သည်။ ရေဆင်းစနစ်များစောင့်ကြည့်ထိန်းသိမ်းခြင်း၊ မြေဆီလွှာ နှင့် သဘာဝပေါက်ပင်လေ့လာရေး နှင့် သီးနှံပင်များ ကြီးထွားမှုနှင့်အထွက်တိုးနှုန်းလေ့လာရာတွင် အသုံးပြုကြသည်။
ဤ band combination တွင် အပင်များကိုအနီရောင်၊ မြေပြင်ကို အညိုရောင်အနုအရင့်၊ လူနေမြို့ပြအရပ်ကို စိမ်းပြာရောင်အဖြစ်မြင်ရမည်ဖြစ်သည်။ ဆီးနှင်း၊ ရေခဲပြင်နှင့် တိမ်များကို စိမ်းပြာနုရောင်သို့မဟုတ် အဖြူရောင်အဖြစ်မြင်ရမည်။ သစ်မာပင်များကိုထင်းရှူးပင်များထက်ပိုမိုနုသောအနီရောင်ဖြင့် တွေ့မြင်ရမည်ဖြစ်သည်။ ယေဘုယျအားဖြင့် အနီရောင်စိုစိုရင့်ရင့်သည် စိမ်းလန်းသောအရွက်များဖြင့် ဖုံးအုပ်နေသောအပင်များကို ကိုယ်စားပြုပြီး ၊ နုသောအနီရောင်သည် အရွက်ကျဲပါးခြောက်သွေ့သော သစ်ပင်များနှင့် မြက်ခင်းများကို ကိုယ်စားပြုသည်။ လူနေထူထပ်သောမြို့ပြအရပ်ကိုမူ အပြာနုရောင်အဖြစ် မြင်ရသည်။ ဤရောင်စဉ်တွဲစပ်ပုံရိပ်မှ ပေးသော အချက်အလက်များသည် အနီအောက်ရောင်ခြည်ဖြင့် ရိုက်ယူထားသော ပုံများမှပေးသောအချက်အလက်များနှင့် ဆင်တူလှသည်။
မီးလောင်ကျွမ်းထားသောမြေပြင်သည် ဤ band combination တွင်တောက်ပစွာအလင်းပြန်လေ့ရှိသည်။ ထို့ကြောင့်တောမီးနှင့်မြို့ပြမီးကြောင့်လောင်ကျွမ်းရသောအပျက်အစီးများကို စုံစမ်းထောက်လှမ်းရာတွင် အလွန်အသုံးဝင်သည်။ မီးတောင်ချော်ရည်စီးကြောင်းများ၊ တောက်လောင်ဆဲမီးတောက်များနှင့် ပူပြင်းသောမျက်နှာပြင်များကို ဤ band combination တွင် တောက်ပသောအခြေအနေဖြင့်မြင်တွေ့နိုင်သည်။ ဘူမိဗေဒမြေပုံရေးဆွဲရာတွင်လည်းအလွန်အသုံးဝင်သည်။ ဤ band combination သည် ကျောက်အမျိုးအစားများခွဲခြားရာတွင် မတူအနည်းငယ်ကွဲပြားသော အရောင်များကိုလေ့လာခြင်းဖြင့် ဘူမိဗေဒမြေပုံရေးဆွဲရာတွင်လည်း အထောက်အကူပြုသည်။ Band ၃ ခုအနက် SWIR band ၏ အလင်းရောင်ကို မသိမသာမြှင့်တင်ခြင်းအားဖြင့် တွင်းထွက်သတ္တုရိုင်း များ၏ အရောင်ပိုမိုထင်ရှားတောက်ပစေပါသည်။
SWIR2, NIR နှင့် Red Band တို့၏အသုံးဝင်ပုံ
ဤ band combination ရှိ band အသီးသီးတွင်ထင်ရှားသောဝိသေသများရှိကြသည်။
Short-wave Infrared 2 – SWIR2 band သည် ဘူမိကျောက်စဉ်စုများခွဲခြားရာတွင် အထူးအသုံးပြုသည်။ ထို့ပြင် ကမ္ဘာ့မြေမျက်နှာပြင်ပေါ်မှ ထုတ်လွှတ်သည့် အနီအောက်ရောင်ခြည်ပမာဏ (Infrared radiant flux) ကိုတိုင်းတာရာတွင်လည်း အသုံးဝင်သည်။
Near-infrared band – NIR band သည် အပင်များ၏ဇီဝဓါတ်အစုအဝေးကို ညွှန်ပြရာတွင်အသုံးပြုသည်။ ၎င်းကို သီးနှံပင်များခွဲခြားလေ့လာခြင်း၊ စိုက်ခင်းများနှင့်မြေပြင်အားခွဲခြားခြင်းနှင့် ရေပြင်၏နယ်နိမိတ်များ သတ်မှတ်ရာတွင်သုံးသည်။
Red band – Red band သည် အပင်များခွဲခြားသတ်မှတ်ရာတွင် မရှိမဖြစ်အသုံးပြုရသော band ဖြစ်သည်။ ထို့ပြင် ဘူမိကျောက်စဉ်စုများ ခွဲခြားခြင်း၊ မြေအမျိုးအစားများခွဲခြားရာတွင်လည်း သုံးသည်။